واش قالو النسا في الجزائر على كيفية العناية بالطفل في المنزل والمدرسة
مادابيكم كل أم تقولنا كيفاه راهي تهتم بهندام اولادها اكيد النظافة مطلوبة دائما لكن انتي كأم تحبي تنوضي الصباح تلبسي لولادك لباس أنيق تحرصي على النظاقة و الاناقة تمشطي لبنتك مشطة مليحة ديري الريحة لاولادك يوميا او تكتفي فقط بالنظافة وتقولي راهم صغار المهم يكونوا نظاف وخلاص انا نحب الاناقة بزااااف ونهتم بالتفاصيل الصغيرة حاسة روحي رايحة نهبل ههههه
Hala:انا عن نفسي نحب التفاصيل ولو اني نتعب لاكن نفرح كيتجي بنتي وتقولي قالتلي المعلمة جيتي باهية 🥰🥰🥰
Halima :وجدي الملابس تاعهم مع ليل أو المغرب صباح تلبسيهم برك
Houda :انا نتبع التفاصيل من لفوق للتحت ههه ولازم يكونو اناقة ونظافة طبعا وريحة ماتخطيهمش مام كي يخرجو يلعبو برا لازم يخرجو من دار نظاف و ريحتهم الله الله
Mariem :نغسللها وجها ونمشطلها شعرها خطرات نطلقولها ولبسلها حاجة نقية وتخرج تلعب وفليل نطرفلها ونمشطلها شعرها نضفرولها ونبدللها حوايجها
Khadija : انا ندوشلهم مرتين في الأسبوع ادا كان الحال دافى و نبعثهم بملابس نظيفة نو مآزر و محافظ نقطة و ارجع للسطر التفاصيل الصغيرة عندي انا واجباتهم مخدومة و ادواتهم موفرة و قرايتهم كيف كيف
Farah :تبدل حوايجها.المئزر نظيف.الشعر ممشوط.الحذاء ممسوح. الصلاة على النبي.العطر ماشي كل يوم.كي يجي في بالي.الاكسسوارات للمدرسة لالا. اللمجة وقارورة الما. ونراقب المحفظة
Karama :النظافة مليحة ليهم كهيئة وكذلك تربية للكبر ومام الوقت يطلب انه طفلك يكون نظيف خطرش المظهر راح يلعب دور اساسي في حياة البشر
Samia :انا نخدم الصباح ينوضو وحدهم نفطرهم لكبير يلبس وحدو وانا نراقب الصغير نلبسو انا نمسحلهم صبابطهمو نشوف ضفارتيهم و عينيهم و وذنيهم و نديرلهم بارفان و نمشطلهم ونخرجو تعودو هكا كون ننسى حاجة يفكرني لكبير ربي يحفظهم ويفتح بصيرتهم وكل اولاد المومنين
Galia :ان نوجدلهم قشهم فليل حت الحداء التاعهم نمسحه فليل صباح غير نود ندير لحليب ؤفوق النار . ونودهم يروحو للمرحاض و يغسلو وجهم ويجو يتقهوو ويعاودو يروحو يغسلو سنانهم ويمسحو وجهم وان نلبسلهم و نديرله ريحو ونمشطلهم شعرهم ويلبسو الاحذية تاعهم ويروحو يقرو
Lamis :انا نهتم بادق التفاصيل تقاشر وملابس داخلية يتبدلو يوميا ويدوشو ونمشطلهم ونقصلهم اظافرهم ونقيلهم مور الاذن تاعهم ومدرسة عندهم ملابس باينة هوما يطلبوهم زي مدرسي ونشري تبديلة كي يتوسخ نلبسهم اخر ونشوف المحفظة ويتمسح السباط حشاك ونديهم نوصلهم
Yasmina :اكيد المظهر مهم بزاف وعلى اساسو رايحين يتعاملو وهوما صغار وهوما كبار ولكن حصنيهم بالله
Hanine :منكذبوش علا رواحنا بزاااف لخاطر ذرراري كي تضلي تبدليلهم يوسخو رواحهم انا عندي وليدي سنا وين دخل يقرا صبح نبدلو حوايجو ويدير الريحة ويروح حوايجو يكمل بيهم سمانة وكي يجي ملقراية يلبس حوايج تع دار ماشي لواحد يضل يغسل بزاف نسا فيهم غير زوخ
Nassima :نحرص على الدوش ونظافة الاذنين والاظافر والاسنان لكن الريحة ما نديرش بزاف مواد كيميائية والحرص الاكبر على تغيير الملابس الداخلية
Basma :تحرص على نظافة الملابس والمازر والحذاء لازم يكون ممسوح كي يدخلووللدار الحوايج بتنحاوويلبسو تاع اللعب ولا تاع الدار مانحبش حوايج القرايه يقعدو بيهم وشعرهم لازم ممشوط الدوش اخر الاسبوع الريحه مع الصباح باش تروح ريحتهم باهيه الملابس الداخليه تتبدل وتنغسل هي و الجوارب نهار بنهار وخطرات كل يوم والحرص على تعليمهم الوضوء والصلاة هي كفيله بالحفاظ على نضافتهم
Fatima :النظافة اولا... لباس الدراسة وحدو جامي نعطيهلو يخرج بيه غير اوقات الدراسة... يبقى طول نظيف... والريحة مش شرط المهم يكون غاسل ومنظف
Wahiba :بنتي عمرها 6 اشهر من نهار خلقت بدات عجوزتي تغسلها كل صباح و تبدلها حوايجها و حكمت عليها لليوم نوضها على 7 باش توالف تبكر.. نديها للدوش و نغسلها من رقبتها لتحت مليح و نلبسلها حوايج نضاف و نمشطلها و نفطرها و نردها لسريرها تلعب على 1 نزيد نمسحلها بسربيتة مشمخة و نبدلها حوايجها و ترقد و كي تنوض العصر نزيد نمسحلها غير بسربيتة مشمخة و فليل ندوشها و نبدلها حوايجها و ترقد....
كيما دوق دوشتها و حطيتها ترقد .
و عندها من لي كانت صغيرة البيجامة تاع الرقاد نوجدهالها فسريرها
و حوايج الصباح ثاني بايينين.... خاطر كيما تولفها تحكم. حتى الكبر
والفتلها كي تاكل ماتوسخش .. مام لاكوش تدير فيها شوي برك تولي تبكي لازم نبدلهالها... و ربي يقدرني نقعد على نفس الروتين حتى تكبر.
نحب بنتي تكبر نظيفة و منظمة.
Hadil :تنظيف الأسنان-الغسل بالصابون-تنظيف الاظافر والاذنين-تنظيف الحذاء-تسريح الشعر-الملابس انيقة ماشي سيرافاتمو-المشوار فالجيب-الريحة-والساعة-ربي حفظهم وينجحهم ويارب نشوفوهم انيقين واعلى المناصب
Hadjer :السلام عليكم ورحمة الله وبركاته امهات
حبيت نقدم لكم نصيحة لوجه الله ربما تفيد الاغلبية ولي متحبش شكرا
نشوف بزاف اخوات منكم يحوسوا على قراية اولادهم على اكلهم على ملابسهم على ارضاءهم
لكن اخواتي حاجة مهمة متنساوهاش هي العبادة
مثلا طفل اربع سنوات ضروري تبداي تعرفيه بدينو قبل الحروف و الأرقام وقبل كل شي
مثلا كي يقلك امي اعطيني نشرب الماء قوليلو قل بسم الله كي يكمل الحمد لله كي يدخل الخلاء كي يجي يرقد يرقد على اليمين بش ميجيهش الشيطان ووووووووووو بزاف امور لازم يتعلمهم
حتى لسبع سنوات لازم يتعلم بدا يصلي بشوية بشوية يوالف
وهاد الأمور ماشي بالعنف لازم بلين والترغيب مثلا يا ابني اذكر الله كي تاكل بش مياكلش معاك الشيطان وتكبر وتولي قوي
والأمر المهم والأساسي هو لازم لازم وضروري الطفل يدخل للمسجد يتعلم لانو في المسجد يعلموه الأخلاق لي ميعلمهالو حتى واحد ويستعقل وينضج
والبنت كذلك تتعلم تصلي بالحجاب حتى تولي تحبو
وربي يحفظ أولادكم واولاد المسلمين
Batoul :المهم بنتي تخرج نظيفة ريحتها مليحة تكون مدوشة الشعر نقي الاظافر الاذنين الفم...اللبسة نظيفة والطابلية راهي ملفوق..الطفل بما انو يلعب و يتحرك بزاف لازملو ملابس واسعة وتتكسل وتكون مريحة باه مايديرونجاش نهار كامل....ماكالاه اللبسة الضيقة راهي تخنق وتعيق الدورة الدموية وديرونجي في الحركة...خمو في راحة ولادكم اكثر من الاناقة والستايل مش رايحين لعرض ازياء ..
Fadila :انا نهتم بأدق التفاصيل و يهمني مظهر ولدي و هندامو نحبو عالشعرة كل أسبوع يروح للحمام مع باباه و نعاودلو يوم الثلاثاء قشو نبدلو مرتين فالسمانة و مرات اكثر حسب الحاجة صباح ينوض يغسل وجهو و اسنانو يفطر نلبسلو و نمشطلو شعرو و نديرلو بارفا يوميا نمسحلو صباطو صباح و لعشية و تقاشر كل يوم نبدلهم حمدلله ملي كان تحضيري و انا على نفس الروتين حتى هو والف كي ننسى انا حاجة هو يكملها و ما ينساس و المعلمة تاعو تموت عليه يقولي راهي ديما تبوسني و تقولي ريحتك مليحة حبيب قلبي ربي يحفظو و يحميه ان شاءالله
Nadjet :النظافة من الايمان و هي ضرورية،رأيي ان الطفل اذا والف الاناقة و النظافة راح يبقى انيق، انا نوجد لبس المدرسة في الليل، كل واحد يلبس قشو يلقاه واجد،ثم اقوم بمراقبتهم فقط و تعديل بعض الاشياء، كل يومين لباس جديد اذا ماتوسخش، المأزر لازم نظيف، العطر ولادي يديرو وحدهم.الله جميل يحب الجمال، مظهر الاطفال الانيق يبعث البهجة في القلوب،نحن نتحدث عن اللبس النظيف وليس باهض الثمن،الاطفال يتعلموا النظافة من الصغر و لازم نعلموهم روح المسؤولية،،و النهوض باكرااااا هو السر سيدتي😇😇😇و لي راهي تقول المظهر مش مهم يكبروا ولادك و تندمي على هاذ الهدرة.ربي يقدرنا جميعا
جميل
ردحذفالمظهر مهم لكن حبذا لو اهتم الآباء بتنشئة الأبناء على القيم والأخلاق اهتمامهم بتفاصيل الملابس وتسريحات الشعر
ردحذف